Posts Tagged ‘bhavnath’

ગિરનાર પરિક્રમા 2011

This slideshow requires JavaScript.

કાર્તક સુદ અગિયારસ આવે એટલે ગુજરાત ભરના શ્રદ્ધાળુઓ ગિરનાર પરિક્રમા કરવા ભવનાથ નીકળી પડે છે. બે દિવસ પહેલાં જ ભવનાથ ખાતે પરીક્રમા પુરી થઇ. આમ જુઓ તો પરિક્રમાની શરૂઆત નોમને દિવસેથી જ શરૂ થઇ જાય છે. આ વખતે વન વિભાગ દ્વારા નોમ પહેલાં શ્રદ્ધાળુઓને જંગલમાં પ્રવેશવા દિધા નહોતા. આથી કેટલાંક લોકો કે જેઓ પરિક્રમા કરવા વહેલાં નીકળી ગયા હતા, તેઓએ રૂપાયતનની પાસેની ખુલ્લી જગ્યા – આંબાવાડીયામાં રાતવાસો કરવો પડ્યો હતો.

આ વખતે પરિક્રમા રવિવારના દિવસે હોય, ઘણાં સરકારી કર્મચારીઓએ (મેં પણ) પણ પરિક્રમાનો લાભ લીધો હતો. મારે તો આમેય ઘર બેઠાં પરિક્રમા હોય, કારણ કે ઘર પાસેથી જ લોકો નીકળે. ને વળી પરિક્રમાનું ઉદ્ઘાટન પણ અમારે ત્યાંથી જ – રૂપાયતનનાં પરિક્રમા પ્રવેશદ્વારથી થાય. તા. 06-11-2011 ના રોજ રાત્રે 12 વાગ્યે રૂપાયતન ખાતેથી વન વિભાગ, સાધુ સંતો, કલેક્ટર તથા મનપા દ્વાર પરિક્રમા ખુલ્લી મુકવામાં આવી. જય ગિરનારી, હર હર મહીદેવના નાદ સાથે લોકો નીકળી પડ્યા. અંદાજે 10 લાખ લોકોએ પરિક્રમા પુરી કરી હશે. આ પરિક્રમાના કેટલાંક ફોટોગ્રાફ્સ લીધા છે, તથા વિડીયો પણ રેકોર્ડ કર્યો છે. નાની એેવી ડોક્યુમેન્ટરી કહિ શકાય તેવો પ્રયત્ન કર્યો છે…

નરસિંહ મહેતા એવોર્ડ ૨૦૧૧ – ભાનુપ્રસાદ પંડ્યાને

“દેખ્યાનો દેશ ભલે લઇ લીધો, નાથ!
  પણ કલરવની દુનિયા અમારી!”

આ ગીત ભાગ્યે જ કોઇએ નહિં સાંભળ્યું હોય ! આ ગીતના રચિયતા કવિશ્રી ભાનુપ્રસાદ પંડ્યાને નરસિંહ મહેતા એવોર્ડ ૨૦૧૧ પૂ. મોરારી બાપુ દ્વારા એનાયત થશે.

નરસિંહ મહેતા એવોર્ડ ગુજરાતી સાહિત્યનો અપાતો સૌથી મોટું પુરસ્કાર – એવોર્ડ છે. નરસિંહ મહેતા એવોર્ડમાં સન્માનિત કવિશ્રીને રૂ. ૧,૫૧,૦૦૦/-ની રાશી આપવામાં આવે છે. નરસિંહ મહેતા એવોર્ડ કવિને તેના સમગ્ર સાહિત્ય સર્જન માટે આ એવોર્ડ એનાયત કરવામાં આવે છે. આ એવોર્ડ પૂ. મોરારી બાપુનાં હસ્તે આપવામાં આવે છે. છેલ્લાં કેટલાંક વર્ષોથી આ એવોર્ડ રૂપાયતન – ગીરનારની ગોદમાં આપવામાં આવે છે. પરંતુ આ વખતે, પૂ. બાપુની કથા સોમનાથ ખાતે હોઇ, આ રૂડા અવસરે જ આ એવોર્ડ આપવાનું રાખેલ છે. આગામી તા. ૦૮-૧૦-૨૦૧૧ થી મોરારી બાપુની રામકથા સોમનાથ ખાતે પત્રકારો દ્વારા યોજાનાર છે. આ કથામાં તા. ૧૧ ના રોજ કવિશ્રી ભાનુપ્રસાદ  પંડ્યાને ગુજરાતી સાહિત્યનો શ્રેષ્ઠ પુરસ્કાર – નરસિંહ મહેતા એવોર્ડ એનાયત થશે.

નરસિંહ મહેતા એવોર્ડથી સન્માનિત મહાનુભાવોઃ

ભાનુપ્રસાદ પંડ્યાઃ


જન્મઃ ૨૪-૦૪-૧૯૩૨
ગામઃ તોરી (અમરેલી)
કાવ્ય સંગ્રહો: ‘અડોઅડ’, ‘ઓતપ્રોત’, ‘શબ્દે કોર્યાં શિલ્પ’, ‘ક્ષણ સમીપે ક્ષણ દૂર દૂર’

અંધ જનનું ગીતઃ


દેખ્યાનો દેશ ભલે લઇ લીધો, નાથ!
પણ કલરવની દુનિયા અમારી!

વાટે રખડ્યાની મોજ છીનવી લીધીને
તોય પગરવની દુનિયા અમારી!

કલબલતો થાય જ્યાં પ્હેલો તે પ્હોર,
બંધ પોપચામાં રંગોની ભાત,

લોચનની સરહદથીને છટકીને રણઝણતું
રૂપ લઇ રસળે શી રાત!

લ્હેકાએ લ્હેકાએ મ્હોરતા અવાજના
વૈભવની દુનિયા અમારી!

ફૂલોના રંગો રિસાઇ ગયા,
જાળવતી નાતા આ સામટી સુગંધ,

સમા સમાના દઇ સંદેશા લ્હેરખી
અડક્યાનો સાચવે સંબંધ !

ટેરવાંને તાજી કૈં ફૂટી તે નજરુંના
અનુભવની દુનિયા અમારી !

૪૬મું ગુજરાતી સાહિત્ય પરીષદ રૂપાયતન-જૂનાગઢમાં

પૂ. મોરારીબાપુનાં પ્રેમાશિષથી ગુજરાતી સાહિત્ય પરીષદનાં ૪૬માં અધિવેશનનું આયોજન રૂપાયતન સંસ્થાના યજમાનપદે જૂનાગઢ મુકામે તા. ૨૨ થી ૨૫ ડીસેમ્બર, ૨૦૧૧ ના રોજ યોજાશે.

આપણી માતૃભાષાનાં આ ગૌરવશાળી અવસરે મૂર્ધન્ય સાહિત્યકાર, ઉત્તમ નિબંધકાર, અનુવાદક અને વિવેચક આદરણીય શ્રી ભોળાભાઇ પટેલ અધિવેશનનાં પ્રમુખપદે બિરાજશે. આ સાહિત્યિક અવસરે પરીષદનાં નિવૃત થતા પ્રમુખ આદરણીય શ્રી ભગતીકુમાર શર્મા તથા સર્વશ્રી રઘુવીર ચૌધરી, અનિલા દલાલ, નરોત્તમ પલાણ, રાજેન્દ્ર પટેલ, માધવ રામાનુજ, કિરીટ દુધાત, સુવર્ણાબેન, મોહન પરમાર, કાનજી પટેલ, વર્ષા અડાલજા, દિપક મહેતા, નિતીન વડગામા, અવધેશકુમાર સીંધ, વિષ્ણુ પંડ્યા, રતિલાલ બોરીસાગર અને ગુણવંત શાહ જેવા આપણી ભાષાનાં અનેક આદરણીય સર્જકો ઉપસ્થિત રહી વિવિધ વિષયો ઉપર પોતાનાં વિચારો અભિવ્યક્ત કરશે.

પૂ. મોરારીબાપુનાં સાનિધ્યમાં યોજાનાર આ અધિવેશનમાં અતિથી વિશેષ તરીકે ઓડીયા ભાષાનાં સુપ્રસિધ્ધ સર્જક શ્રી મનોજ દાસ ઉપસ્થિત રહેશે.

સગૌરવ જણાવવાનું કે, આ અગાઉ ગુજરાતી સાહિત્ય પરીષદનું અધિવેશન મુર્ધન્ય સાહિત્યકાર શ્રી કનૈયાલાલ મુનશીનાં પ્રમુખપદે જાન્યુઆરી – ૧૯૪૯માં જૂનાગઢ ખાતે યોજાયેલ અને ગુજરાતી સાહિત્ય પરીષદનું ૨૫મું અધિવેશન મૂર્ધન્ય કવિ શ્રી સૂન્દરમ્ નાં પ્રમુખપદે ડીસેમ્બર – ૧૯૬૯માં જૂનાગઢ ખાતે યોજાયેલ, લગભગ ૪૨ વર્ષ બાદ પુનઃ આવો ગૌરવશાળી અવસર જૂનાગઢનાં આંગણે આકાર લેવાનો છે.

આ રૂડો અવસર ત્યારે જ જાજ્વલ્યમાન બને કે, જ્યારે આપનાં જેવા સાહિત્યપ્રેમી મિત્રો આ પ્રસંગમાં સક્રિય રીતે જાડાય.

આ અધિવેશનમાં ભાગ લેવા ઇચ્છતાં બહારગામનાં પ્રતિનિધીઓએ ભોજન-ઉતારા શુલ્ક રૂ. ૨૦૦/- તથા પ્રતિનિધી શુલ્ક રૂ. ૧૦૦/- મળીને કુલ રૂ. ૩૦૦/- ભરવાનાં રહેશે. વિદ્યાર્થીઓએ ૫૦% રકમ એટલે કે રૂ. ૧૫૦/- ભરવાનાં રહેશે. પરંતુ તેમણે શાળા-કોલેજના ઓળખકાર્ડની નકલ આપવાની રહેશે.

ઉપરોક્ત દર્શાવેલ શુક્લ મનીઓર્ડર, ડીમાન્ડ ડ્રાફ્ટ કે રોકડાં રૂપાયતન સંસ્થા ખાતે તા. ૩૦-૧૧-૨૦૧૧ સુધીમાં જમા કરાવવાના રહેશે. અધિવેશન સમયે સ્થળ પર પ્રતિનિધી શુલ્ક સ્વીકારવામાં આવશે નહિં, જેની નોંધ લેવા નમ્ર વિનંતી છે.

સંપર્ક:

રૂપાયતન,
ગીરી તળેટી,
ભવનાથ,
જૂનાગઢ-૩૬૨૦૦૪
ફોનઃ ૦૨૮૫ ૨૬૨૭૫૭૩